NA MIT HUUM SIN

Boinu4
  • Add Comments
  • Print
  • Share this Post

Pian hun aum a…..huleh sih hun jong aum…”Thusoitu 3:2

Damdawi tang lian a lian khat nurse nungaah melse lou deuh in tui toh ahung pia a. A damdawi tang letdan chu i valhjoh chiah i gilpi sunga pat a poimoh namun teng teng a kidaih diing ahi chih haih gual ahisih.  Tui ka la a, damdawi ka kama muam kawm in tui ka dawn a. Damdawitang in a gei suh na na phunaam suh vut vut hile kilawm in ka thei hi. Sawtlou nung in ka ihmut ahung suaah a, ngaiin, ka ihmu ta. Huleh mang ka nei a, tuui tah in ka ihmu ta hi.

Ka mang in mipi  mipi tam a tam petmah, vaibeelsia, vaibeelsetahtah, tuhlehdingawn sang a tam  jaw soina bang a tai?? Husang a tamjaw mihing lampi a kizui dim metmut ka mu a. Hute laha numei naupang, pasal naupang;  khanglai nungaah leh tangval; meelhoih leh meelhoih lou jong. Nupi leh papi te huleh piteeh puteeh te jong a tel uh. Mipite lah ah kilungsiatna jong a tawm mah mah chih ka mu thei hi. Ken jong mipite khoilam juan a pai ahi di ve aw???, chia ka gaaldot lai’n …..katei aww….a zotna lampi uh chu chizathuai tah hanmual lampi ahi chih ka mu a. Ama vah hanmual lianpi in ana ngaah a, ahi, lampi khat chauh a um a, pial na diing lampi dang mawng mawng a um sih.

images (18)

Mipi te chu chiang deuh in ka en a, khenkhat te awl awl in a pai va, pilvang tah in. Hijongleh khenkhatte chu kinoh deuhin a lapman louh diu lau hile’u kilawm in tai in a tai thawh uha. Khenkhatte tawl kisa in lamgei ah a tou va, akhen te a awngna mun mun ah a lum uhi. Huleh a khente lah hanmual nungngat in awl in a ki nungtawl va, ajotna mun uh a tung deh ta uh. Hijongleh amahun a jotna mun uh tungdehta ahihlam uleh a mun chizat huaidan a thei sih uhi. A dang khenkhat ten chu a jotna lampi uh chiang deuh in a mu va, pumpelh theihna diing lampi a hawl a hawl va, a bei dong ta uh.

Vanlamah ka daahtou a, vaana Angel puanvam silh a leng tampi ka mu a. Amah un mipite chu amitva lungsiatna a dim in a en va. Mipite laha houtu a kineihte’n kei hung jui un, chia mipite apui uchu a gal et va. Lamkai khenkhatte’n amipi liam leh tawl, bah leh chau  te neehdiing leh dawn diing apiah uh Angelte’n a mu uhi. Lamkai khenkhat te’n a mipite’u neeh diing tanghou leh tui a mau a diinga,  sakhauva aki phualguuh uh amuh un Angelte’n anuih san va. Ama va thil phualguuh inla umzia anei sih ngal a. Amin chiamteh hile’u kilawm tah in lehkhabu lianpi khat ah agial lut uhi. Mipite laha numei naupang, pasal naupang, khanglaite, nu-le-pa huleh pi-le-pute pilvang taha pai a, a kiimvel va um anu-apa panpih ngaite panpih kawma pai amuh chiang un Angelte meel chu ama sang a vaah jaw hileh kilawm in a tang sing seng a. Hijongleh amah nopsahna diing ahihphot leh chia a unau kalhpuuha, khoningailou mite amuh chiang un Angelte meel chu a mual nilneel chih ka mu thei hi.

Sihna chu nih(2) a um a ki chi a. Khatna chu tahsa sihna huleh anihna hagau sihna chu. Huleh Tahsa sihna chu chi thum(3) in a ki khen sawn ahi chih ka mang in ka na mu a.

Hanmual chizat huaitah mei zuana mipi pai khenkhat te chu  aphaahna diing mun uh a tun ma un a hinna uh laahsah ahi a.  Pathian in hu a haihkhuma hinna nei mihing chu, aneitu’n a  laahsah kiit taah jiah in. Huchu tahsa sihna khatna ahi hi.  A tahsa chu leitung ah a umnalai a, himahleh hinna-huih amah ah aum non sih. Pathian in mihing jousiah a mimal malin a hu a haihkhum a, hinna apia hi. A haihkhum mihing hinna nei jousiah chu Amah a ahi va. Ama’n a piah chu a ut hun hun in a la kiit thei a, hijongleh koima kawmah apiah hinna la diing in phalna a pe lou. Bangchituh in hat in haangsan jongleh, bangchituh in hausa henla pil jongleh. A piah hinnna mihingte tunga kithuneisah taha gamtang mite amuh chiang in a thangtawm a. Hubang a gamtang innsung leh innkuante tung a thiltung chu a chizathuai talua a ka en ngam ta sih. Hijongleh Angel in ‘na mit huum sin la, chiangtah in en in’ ahung chi a. Ka mit ka hah a, Pathian lungthahna lauhhuai dan chiang deuh in ka mu hi.

Mihing hinna-huih nei non lou chu haanmual ah pui in aum a. A tahsa chu a kisiamna leivui mah a kiih kiit diing in. Mihing tahsa  muhtheih nonlouh diing leh muat mang diing a leinuai mial a kiphuum ni chu Sihna nihna kichi chu ahi.

Hanmial ana pai masa te chu iit in suun mahle’u hun a hung liam zel a. A damlai va a mun uh midang leh thildang ten ahung luah a. A thilbawl uchu hun in a liampih ta, a min uh nasan khovel ah genkhaah a hi non tasih. Khovel ah ana piang uh chih nasan heetphaah ahi non sih hi. Huchu Sihna thumna ahi hi. A damlai va thilhoih leh thilmanpha ana bawl khaah louh ziah un, amah uchu mangngilh a hi ta va. Heetphaah mawng mawng ahi non ta sih uh. Hijongleh  mipite laha sihna nihna tan tung a hijongleh sihna thumna tung lou mite chu ka mu a. A damlai va a hinkhua uh midangte diinga lungsiatna a luanglet mite hi un ka mu hi.

Angel ten kei lam ahung en va, nang jong ka kawmvah na hung ut ta ei???chiin ahung pui sawm va. “….ngailou, ka ut nai sih…… ngailou…” chiin ka kikou a. Thakhat in ka ihmut na apat in  ka khanglou a. Ka khosa neel in a hung buah a, khoi a um ka de aw?? chia ka kiim ka et vel lai in. Nurse melhoih tah mei chu ka ann neeh diing tawi in ka kawma ding in a hung na nuihsan a. Zum sim chem cham kawm in ann chu ka la a, ka neta hi.

 

KA PIANVOU

Sihna’n nikhat ahung lamtuah ngei diing a
Ka tahsa chu a kisiamna maha kiih in buanlei a suah diing,
Ka hagau, ahung tantu ka Pathian kawmah
Leitung lungngaihna leh gentheihna peel in a leeng ta diing.

Ka innsung mite , ka lawm leh gual, huleh ka chipihte’n
A hung suun diing va, hijongleh a lungsimvah sawt ka thaam sih diing,
A hung kiletsahpih kham diing uh thil thupi bangma ka bawllouh jiahin
Ka min chu leitung apat in thaimang ahi ta diing hi.

Huleh tu’n hichu ka ngaihtuah a, sihna’n a hung lamtuah masiah
Thuhoih a ka heet chu, ka siam leh siamlouh thu hilou in,
Mawl in simmoh huai jongleh, ka tangkou pih diing
Koima a diing a phatuam kham leh kipaahpih taah hisih mahleh.

Hi thuhou tah tah te apat a, ka unaute lah a khat beeh in
Damna amuhna ahih leh
Ka pianvou chu ka supiching in ka ngai diing a
Lungawitahin kha ka pham thei diing hi.

boinu simte �Y

 

  • chrishlsimte

    Boinu, damsawt mah mah in. Na gial hoih talua…na nam te adiinga Mi thupi leh Mi phattuampih khat na hizing hi …… hung gial ngiit ngeet aw. Lungdam huai thei e, na artikul gelhte i sim hun ah.

  • Andrewsang

    hi bang a thu hoih hung post jel in Boinu damsawt in……….God bless u aboundantly in your future life…………..

  • Lal Simte

    Boinu, Mang hoih leh kilaah dang2 jong hung man jel in…

  • loon

    Boinu, Na lehkhagelh skill ngaihsaanhuai. Bible siam kichite’n hi thutah mah geen sawm leh ung tampi in boring asa diing uhi. Nanga i sim leh abul a’pat atawp tan a kilungluut hi. More, more.

  • Choih Hans

    Sim thanop huai ei.

  • Jeff Simte

    Dih talua. Simnop mahmah eh. Adang jong aw…..